Na NASRA KITANA
WAZIRI Mkuu na mlezi wa timu ya Singida Black Stars, Dk. Mwigulu Nchemba, amenunua tiketi zote za mchezo wa marudiano ya raundi ya pili ya awali ya Kombe la Shirikisho Afrika dhidi ya Tusker FC ya Kenya.
Pambano hilo, limepangwa kufanyika kesho katika Uwanja wa Azam Complex nje kidogo ya jiji la Dar es Salaam.
Mchezo huo wa marudiano utachezwa kuanzia saa 1:00 usiku, huku ikiwa na kumbukumbu ya kushinda bao 1-0 katika mchezo wake wa kwanza uliopigwa nchini Kenya.
Mchezo huo ni muhimu kwa Singida BS ambayo inahitaji ushindi au sare ya aina yeyote ili kufuzu hatua ya makundi kwa mara ya pili mfululizo.
Akizungumza jijini Dar es Salaam, Ofisa Habari wa Singinda BS, Hussein Massanza alisema mlezi wa timu hiyo, Dk. Mwigulu Nchemba amenunua tiketi zote hizo ili kuwezesha Watanzania kuingia bila kulipia.
“Habari njema ni kwamba Waziri Mkuu na mlezi wa timu yetu Dk. Mwigulu Nchemba amenunua tiketi zote za mchezo huo lengo ni kuwapa fursa Watanzania kuingia bure na kwenda kuishangilia timu yao ipate ushindi mnono,” alisema.
Massanza aliwaomba mashabiki na wapenzi wa soka kwa ujumla kujaaa kwa wingi ili kuwapa sapoti ya kutosha wachezaji wa timu hiyo wafanye vizuri.
Katika mechi sita za hatua ya makundi msimu wa 2025/26, Singida ilipata ushindi mmoja, sare mbili na kupoteza mechi tatu, ikifunga mabao matatu na kuruhusu sita. Ushindi wake pekee ulikuwa wa bao 1-0 dhidi ya AS Otoho ya Congo.
Msimu huu, timu hiyo imeanza kwa kasi tofauti katika hatua za awali, ikifunga mabao 10 dhidi ya El-Ghazal ya Sudan Kusini na kisha kupata ushindi muhimu wa ugenini dhidi ya Tusker, mechi lichezwa Oktoba 18,mwaka huu.
