Na MWANDISHI MAALUMU
WAZIRI wa Nchi, Ofisi ya Makamu wa Rais (Muungano na Mazingira), Mhandisi Hamad Yussuf Masauni, amesema Tanzania imejipanga kuwa kitovu cha soko la kaboni barani Afrika kwa kuendelea kuimarisha mifumo ya usimamizi, uwazi na uwekezaji kuhakikisha biashara hiyo inachangia ukuaji uchumi na kuboresha maisha ya wananchi.
Masauni amesema hayo, Oktoba 22, 2026 wakati akifungua Jukwaa la Soko la Kaboni na Uwekezaji Tanzania 2026, jijini Dar es Salaam, likiwa na kaulimbi: “Siku Moja. Soko Moja. Maono ya Pamoja.”
Amesema serikali inalenga kuhakikisha biashara ya kaboni inakuwa nyenzo muhimu ya maendeleo ya taifa kwa kuzalisha ajira, kuongeza mapato ya jamii, kuvutia uwekezaji, kuhifadhi misitu na kuendeleza matumizi ya nishati safi, sanjari na utekelezaji wa Dira ya Taifa ya Maendeleo 2050.
“Tanzania imeamua kuwa kitovu cha soko la kaboni lenye uadilifu barani Afrika, soko ambalo kila tani ya kaboni inayothibitishwa inatafsirika kuwa ajira kwa vijana wetu, mapato kwa vijiji vyetu, misitu iliyohifadhiwa, nishati safi majumbani mwetu na mtaji wa kutekeleza Dira ya Taifa ya Maendeleo 2050,” amesema.
Masauni ameeleza mafanikio ya soko la kaboni hayatategemea wingi wa miradi pekee, bali ubora wa matokeo, uhalali wa kisheria, uwekezaji unaotekelezwa na manufaa halisi yanayowafikia wananchi.
Amesema chini ya uongozi wa Rais Dk. Samia Suluhu Hassan, ajenda ya nishati safi ya kupikia ni mojawapo ya maeneo yenye fursa kubwa ya biashara ya kaboni, kutokana na uwezo wake wa kufikia mamilioni ya kaya na kuchangia kupunguza gesijoto.
Mtendaji Mkuu wa Kituo cha Taifa cha Ufuatiliaji wa Kaboni (NCMC), Kathryn Kigaraba amebainisha kituo hicho kina jukumu muhimu la kusaidia maendeleo ya soko la kaboni nchini kwa kuzingatia utaalamu wa kisayansi, mbinu sahihi za kitaalamu, uwazi wa taarifa na mifumo ya ufuatiliaji na uthibitishaji.
Amesema lengo ni kujenga soko ambalo miradi yake inatambuliwa na kuendelezwa kwa utaratibu unaofaa, inafanyika kwa uwazi na manufaa yanayopatikana yanachangia maendeleo endelevu ya Tanzania.
Kwa mujibu wa Kigaraba, utekelezaji wa azma hiyo unahitaji ushirikiano wa karibu kati ya taasisi za serikali, waendelezaji wa miradi ya kaboni, wawekezaji, taasisi za fedha, jamii za wenyeji, taasisi za utafiti na washirika wa maendeleo.
Ameongeza mifumo ya kitaasisi inayohusu tathmini ya miradi, usajili wa miradi, ubadilishanaji wa taarifa na ulinzi wa haki na maslahi ya wadau ni muhimu katika kujenga imani ya soko.
Katibu Mkuu, Ofisi ya Makamu wa Rais, Dk. Richard Muyungi, amesema jamii zinazohusika na usimamizi wa misitu, ardhioevu, mikoko na maeneo mengine yenye uwezo mkubwa wa kuhifadhi kaboni, zinapaswa kushirikishwa kikamilifu katika kubuni na kutekeleza miradi pamoja na kupanga namna ya kugawana manufaa.
Aidha, wanawake, vijana, wajasiriamali wa ndani na waendelezaji wa miradi midogo wanapaswa kupata nafasi katika uchumi unaochochewa na soko la kaboni.
