Na Mwandishi Wetu, Ilemela
MRADI wa ufugaji samaki kwa njia ya vizimba katika Halmashauri ya Manispaa ya Ilemela, mkoani Mwanza, umeendelea kufungua fursa za kiuchumi kwa kaya zenye kipato duni, kuwaongezea kipato walengwa na kuwasaidia kujikwamua dhidi ya umaskini.
Akizungumza kuhusu mradi huo, Kaimu Mratibu wa Mfuko wa Maendeleo ya Jamii (TASAF), Halmashauri ya Manispaa ya Ilemela, David Macha, amesema umetokana na vikundi vya akinamama wanufaika wa mfuko huo waliobuni wazo la kufuga samaki kwa njia ya vizimba.
Macha amesema kinamama hao walitambua kuwa, kuishi karibu na Ziwa Victoria ni fursa muhimu inayoweza kutumika kuwaongezea kipato iwapo wanaitumia ipasavyo kupitia ufugaji samaki.
Amesema vikundi vya kinamama vilipatiwa mkopo kupitia TASAF; ambao katika awamu ya kwanza, vilikopeshwa sh. milioni 34, fedha ambazo zilitumika kutengeneza vizimba viwili, kununua vifaranga vya samaki na chakula kuendesha shughuli za ufugaji.
Macha amefafanua kuwa, baada ya kuanza ufugaji, vikundi hivyo vilivuna samaki na kupata sh. milioni 27, ambazo ziliwapa motisha ya kuendelea na mradi huo kujiongeza kipato na kuimarisha shughuli za kiuchumi.
Kwa mujibu wa Macha, baada ya mavuno, wanachama waliamua kuendeleza uwekezaji huo kwa kutumia sehemu ya fedha zilizopatikana, huku kiasi kingine kikitumika kusaidia shughuli nyingine za wanachama, ikiwemo kukopeshana kukidhi mengine ya kijamii.
“Ufugaji samaki kwa njia ya vizimba ni fursa inayoweza kusaidia kuongeza upatikanaji wa samaki, katika mazingira ambayo yamekuwa yakikabiliwa na changamoto ya upungufu wa samaki, huku ukiwawezesha walengwa kujenga msingi wa kujitegemea kiuchumi,” alisema.
MNUFAIKA
Mnufaika wa mpango wa kunusuru kaya maskini unaotekelezwa na TASAF, Modesta Makonya, amesema mradi wa ufugaji samaki kwa njia ya vizimba umemsaidia kuboresha maisha yake na familia, ikiwemo kipato na kujenga nyumba.
Akizungumza kuhusu mradi huo, Modesta, amesema akiwa na kinamama wenzake walifikiria shughuli mbadala za kiuchumi; baada ya mwaka 2024 kuelekezwa kuwa mpango wa kunusuru kaya maskini katika awamu waliyokuwa wananufaika nayo ungefikia mwisho.
Modesta amesema walikaa na kuanzisha kikundi cha wanawake, ambacho baadaye kilipata msaada wa serikali kupitia TASAF, chini ya uongozi wa Rais Dk. Samia Suluhu Hassan, ambao walipatiwa sh. milioni 34 zilizowawezesha kuanzisha mradi wa ufugaji samaki kwa njia ya vizimba.
“Baada ya kupata fedha hizo, tuliweka vizimba viwili, kila kimoja kikiwa na samaki 650. Tulifanya shughuli za ufugaji na tulipofikia wakati wa kuvuna, tulifanikiwa kupata takribani shilingi milioni 29, jambo lililotupa moyo wa kuendelea na mradi huo,” amesema.
AWAMU YA PILI
Amesema mafanikio ya mavuno ya kwanza yaliwafanya waendelee na awamu ya pili ya ufugaji, ambao walitumia sh. milioni 22.4, kwa mahitaji mbalimbali ya mradi huku wakiendelea na maandalizi ya kuongeza uzalishaji kupata mapato makubwa zaidi kwa mavuno yajayo.
Makonya amesema pamoja na mafanikio hayo, mradi huo unakabiliwa na changamoto za kimazingira, yakiwemo magugu maji yanayoathiri shughuli za ufugaji, hivyo aliiomba serikali na wadau wengine kuendelea kuwaunga mkono kuimarisha mradi huo uwe na tija zaidi.
