Na JENIPHER MWACHIPA (UDSM)
BARAZA la Sanaa la Taifa (BASATA) limemfungia staa wa bongo fleva, Rajab Kahali ‘Harmonize’ kujihusisha na muziki kwa muda usiojulikana kufuatia kukiuka maadili.
BASATA imemfungia staa huyo kwa muda hadi atakapofuata utaratibu aliopewa kwa kosa la kuuweka wimbo wa ‘Kudos’ katika Youtube ambao umeonekana kutokuwa na maadili ya Kitanzania.
Maamuzi ya BASATA yameambatana na adhabu ya kulipa faini ya sh. milioni tano ndani ya siku 14 na kuondoa video ya wimbo wake wa mpya wa ‘Kudos’ katika mitandao ya kijamii.
Akizungumza jijini Dar es Salaam, Kaimu Katibu Mtendaji wa BASATA, Edward Buganga alisema wametoa adhabu hiyo ili kuhakikisha wasanii wanafuata maadali yaliyowekwa.
Alisema wimbo huo ulionekana kutokuwa na maadili kutokana na kukiuka maadili na kwamba wametoa onyo kwa wasanii kuhakikisha hawavuki mipaka wanapotoa kazi zao ili kuepuka kufungiwa kila mara.
“Tumemfungia kwa muda hadi pale atakapotimiza masharti ambayo tumempatia, tunaamini hilo litakuwa funzo kwa wengine kuhakikisha wanafuata maadili pale wanapotoa kazi zao,” alisema.
Alisema pia wametoa onyo kali kwa mtayarishaji wa video hiyo Kennedy Sanga ‘Kenny’ ikiwemo kumtaka kulipa faini ya sh. milioni tatu kwa kosa la kutayarisha video yenye maudhui yasiyofaa katika jamii na kutojihusisha na kazi za kisanaa mpaka atakapotekeleza masharti aliyopewa.
Alisisitiza msanii, Faustina Charles ‘Nandy’ ametakiwa kulipa faini ya sh. milioni tatu kwa kosa la kuvaa nguo isiyokuwa na maadili wakati akitumbuiza katika shindano la Miss Universe 2026.
“Vilevile, BASATA haijamwacha salama mtayarishaji wa shindano la Miss Universe, Millen Magese, ametakiwa kulipa faini ya sh. milioni tatu baada ya kumruhusu Nandy kupanda jukwani akiwa na nguo iliyokiuka maadili na tunampa onyo kali kuwa makini wakati wa kutekeleza kazi zake za kisanaa,” alisema.
