Na MWANDISHI WETU
JESHI la Magereza Tanzania limekanusha taarifa zinazosambaa katika mitandao ya kijamii zikidai kuwa Mwenyekiti wa Chama cha Demokrasia na Maendeleo (CHADEMA), Tundu Lissu, ameanza mgomo wa kula chakula kuanzia Oktoba 26, 2026, huku mawakili wake watatu wakizuiwa kumtembelea gerezani.
Katika taarifa hiyo, Jeshi la Magereza limeeleza kuwa taarifa hizo, zinazodaiwa kutolewa na Mkurugenzi wa Mawasiliano na Uenezi wa CHADEMA, Brenda Rupia, si za kweli na zina lengo la kupotosha umma.
Limefafanua kuwa Lissu yupo salama na hajaanza mgomo wa kula chakula kama ilivyoripotiwa.
Kuhusu madai ya kuzuiwa kwa mawakili wake, Jeshi la Magereza limesema mawakili wanaomwakilisha wameendelea kuruhusiwa kukutana naye kwa mujibu wa sheria na taratibu zilizowekwa, baada ya kuthibitishwa kuwa ni mawakili wake.
Limeongeza kuwa linaendelea kutekeleza majukumu yake kwa kuzingatia usalama wa mahabusu na wafungwa wote walio chini ya ulinzi wake halali.
Hivyo, Jeshi la Magereza limewataka wananchi kupuuza taarifa hizo na kuacha kusambaza habari zisizo na ukweli, likisisitiza kuwa kusambaza taarifa za upotoshaji ni kosa kisheria.
