Na AMINA KASHEBA
YANGA ni jeuri baada ya Pacome Zouzou na Laurindo Dilson Maria Aurelio ‘Depu’ kuongoza mauaji kwa timu ya Fountain Gate katika mchezo wa Ligi Kuu Tanzania Bara.
Pambano hilo, lilipigwa katika Uwanja wa Sheikh Amri Abeid mjini Arusha ambapo Yanga ilishinda mabao 2-0, mabao ya ushindi yalipachikwa wavuni na nyota hao wawili.
Kufuatia ushindi huo, Yanga imefikisha pointi 66 huku Fountain Gate ikibaki na alama zake 29.
Timu zote mbili, hadi leo zimecheza mechi 27 kila moja ambapo Yanga inaongoza ligi hiyo.
Hadi sasa Yanga imebaki na mchezo dhidi ya Azam FC, TRA United na JKT Tanzania huku watani wao wa jadi, Simba imebaki na mechi dhidi ya Mtibwa Sugar, Singida Black Stars na KMC.
Katika pambano hilo, lilianza kwa kasi na kushambuliana kwa zamu kwa lengo la kupata bao la kuongoza la mapema.
Dakika ya pili, Fountain Gate ilifanya jaribio la kufunga baada ya mchezaji wake, Juma Issa kupiga shuti lililodakwa na kipa wa Yanga, Djigui Diarra.
Aidha, Fountain Gate ilifanya mashambulizi tena katika lango la Yanga, lakini kipa Diarra alipangua mpira huo na kutoka nje ya uwanja.
Dakika ya tisa Yanga ilipeleka shambulizi katika lango la Fountain Gate, lakini mchezaji wake, Max Nzengeli alipiga shuti kali na mpira ulitoka nje.
Yanga ilifanya jaribio la kufunga dakika ya 35 kupitia nahodha wao, Bakari Mwamnyeto lakini mpira ulipaa juu ya lango.
Dakika ya 45, kipa wa Fountain Gate, Machupa Juma alifanya kazi ya ziada kupangua mpira uliopigwa na mchezaji wa Yanga, Nzengeli.
Kipindi cha pili, Yanga ilirudi na nguvu ya kushambulia kwa nguvu katika lango la Fountain Gate.
Dakika 52 Pacome Zouzoua alifunga bao la kwanza kwa Yanga baada ya kuwatoka walinzi wa Fountain Gate na kupiga shuti kali lilojaa wavuni.
Yanga iliendelea kulisakama lango la Fountain Gate na dakika ya 54 iliandika bao la pili baada ya Depu kupiga shuti lililojaaa wavuni kufuatia kupokea pasi kutoka kwa Allan Okello.
Dakika ya 67, Fountain Gate ilishindwa kufunga bao la kwanza baada ya mchezaji, Elie Mokono kukosa utulivu ndani ya eneo la hatari la Yanga na kupiga shuti lilopaa juu.
Aidha, dakika 90 za nyongeza, timu ya Fountain Gate ilipata pigo baada ya kipa wao, Machupa Juma kupata majereha na nafasi yake ilichukuliwa na Mdoe Athumani.
Fountain Gate iliwakilishwa na Machupa Juma, Jimson Mwanuke, Obinna Awara, Derick Mkombozi, Shaaban Pandu, Shabani Mgunda, Ismail Kader, Henry David, Juma Issa/Ramadhan Sadick, Chukwunoye Macdonald na Elie Mokono/Issa Chole.
Yanga: Djigui Diarra, Bakari Mwamnyeto, Ibrahim Bacca, Maxi Nzengeli, Pacome Zouzoua, Mohamed Hussein, Allan Okello/Edmund John, Kouassi Yao, Mudathir Yahya, Duke Abuya na Laurindo Dilson/Prince Dube.
