Na MWANDISHI WETU
MJUMBE wa Halmashauri Kuu ya CCM Taifa, Shaka Hamdu Shaka, amesema kazi kubwa iliyofanywa na Rais Dk. Samia Suluhu Hassan, imewaheshimisha wanawake wa Tanzania na kuwa Kielelezo kwa bara zima la Afrika.
Shaka aliyasema hayo wakati akitoa salamu katika uzinduzi wa Wiki ya Umoja wa Wanawake Tanzania (UWT) Kata ya Dumila, uliofanyika katika mji wa Dumila, Wilaya ya Kilosa mkoani Morogoro.
“Alama aliyoiacha Dk. Samia kwa Watanzania si ujenzi wa madaraja na barabara tu, alama yake kubwa ni kutuonyesha kwamba Mtanzania hana kikomo. Leo ukitaka kujua mafanikio ya mwanamke yanaonekanaje, haangalii tena Ulaya, anaangalia Ikulu ya Tanzania,” alisema Shaka ambaye pia ni Mkuu wa Wilaya ya Kilosa na kushangiliwa na mamia ya wanawake waliohudhuria uzinduzi huo.
Aidha, Shaka amesema Wiki ya UWT sio sherehe tu bali ni kipimo cha kutathmini heshima ya mwanamke katika jamii.
“Wiki ya UWT ni kutathmini heshima ya mwanamke. Rais Samia ametufundisha kuwa heshima ya mwanamke si zawadi, ni haki.
“Kielelezo hakifi bali kinadumu. Heshima ya Dk. Samia iliyoandikwa kwa wino wa dhahabu itaendelea kuwa urithi wa kizazi kwa kizazi. Wino wa dhahabu haufutiki mvua ikinyesha wala jua likiwaka,” amesisitiza.
Katika sherehe hizo, mgeni rasmi alikuwa Mwenyekiti wa UWT Taifa, Mary Chatanda, aliyeambatana na wajumbe wa Kamati ya Utekelezaji ya umoja huo.
Sherehe hizo pia zilihudhuriwa na Mbunge wa Kilosa ambaye pia ni Waziri wa Nchi, Ofisi ya Waziri Mkuu, Sera, Uratibu na Bunge, Profesa Palamagamba Kabudi.
