Na REHEMA MAIGALA
BAADHI ya wachumi na wasomi, wamesema mkutano wa 153 wa Umoja wa Mabunge Duniani (IPU), unatoa fursa kwa nchi kushirikiana na mabunge mengine kujadili masuala yanayohusu maendeleo, amani, demokrasia na ustawi wa wananchi.
Pia, wamesema wabunge wa Tanzania, watapata fursa ya kubadilishana uzoefu na nchi nyingine kuhusu namna ya kuimarisha utendaji wa Bunge, uwakilishi wa wananchi na ushiriki wa makundi mbalimbali katika shughuli za kitaifa.
Wakizungumza na UHURU kwa nyakati tofauti jana, baadhi ya wadau hao, walisema mkutano huo pia utafungua mijadala ya maendeleo endelevu nchini.
PROFESA KINYONDO
Mhadhiri Mwandamizi wa Uchumi kutoka Chuo Kikuu cha Dar es Salaam (UDSM), Profesa Abel Kinyondo, alisema mkutano huo ni wa kujivunia kwa sababu unatoa fursa mbalimbali.
“Tunatakiwa kwa pamoja tujivunie uhusiano mzuri tulionao na nchi nyingine, kwa sababu tunajua Rais Samia Suluhu Hassan, amefanya kazi kubwa kujenga uhusiano na hali inayojidhiririsha kuwa, Tanzania hivi sasa inajulikana na mataifa mbalimbali duniani.
“Idadi ya watalii hadi kufika mwakani itaongezeka, nina imani hawa wageni waliopo katika mkutano huu, lazima mwakani watarudi kutembelea vivutio vilivyopo na hata kufanya uwekezaji ,”alisema.
Vilevile Profesa Kinyondo, alisema kupitia mkutano huo, sekta mbalimbali zitafaidika zikiwemo za usafirishaji, mawasiliano na utalii.
Dk. DANINGA
Mhadhiri Mwandamizi wa Chuo cha Mwalimu Nyerere Dar es Salaam, Dk. Philip Daninga, alisema mkutano huo, utafungua fursa nyingi za maendeleo.
Dk. Daninga, alisema kuna sababu nyingi mkutano huo kufanyika nchini ukiwemo usalama wa nchi na ulinzi imara uliokuwepo.
“Hawakukurupuka tu mkutano kufanyika nchini kwetu, wamepima vitu vingi vikiwemo, usalama na utulivu wa nchi, ndiyo maana mkutano huo umefanyika.
“Nina imani kubwa baada ya mkutano huo kumalizika, uchumi utaongezeka kwa wananchi, hata serikali kwa ujumla kuna baadhi ya wananchi watakuwa wakiuza bidhaa zao maeneo ya mkutano huo.
“Bidhaa zitakazouzwa ni zile za ndani, vikiwemo vinyago, mavazi na mapambo ya kujipamba ambayo yatakuwa yametengenezwa na vitu vya asili kama shanga, nina uhakika bidhaa hizo zitapendwa zaidi na wafanyabiashara hao, watapata fedha kutoka kwa wageni waliohudhuria mkutano huo,” alisema.
DK. MAGUO
Naye, Mhadhiri Mwandamizi wa Chuo Kikuu cha Huria Tanzania (OUT), Dk. Mohamed Maguo, alisema ujio wa mkutano wa IPU, utatoa fursa nzuri za kidiplomasia.
Alisema Tanzania itaimarisha uhusiano na ushirikiano kwa nchi zilizohudhuria mkutano huo, utasaidia kubadilishana uzoefu katika masuala mbalimbali ya maendeleo.
Pia, alisema mkutano huo, utaiwezesha Tanzania kuendelea kujenga uhusiano wa kimataifa na kuonesha fursa zilizopo nchini katika nyanja za biashara, uwekezaji na utalii.
“Mkutano huu ni fursa nzuri kwetu, ujio huu, unaonesha nchi yetu ni ya amani na ina utulivu wa hali ya juu, tunaamini ujio wa wageni hawautasaidia kukuza uchumi wa nchi yetu, kutokana na fedha za kigeni zitakazotumika katika shughuli mbalimbali za kiuchumi wa kati wa mkutano huu,” alisema.
Oktoba 5, mwaka huu, mkutano wa IPU, ulizinduliwa na Rais Dk. Samia, ambapo unawakutanisha wabunge, maspika, makatibu wa mabunge na viongozi wengine kutoka mabunge wanachama duniani.
