Na MWANDISHI WETU
RAIS Dk. Samia Suluhu Hassan, ameyataka mabunge kuimarisha usimamizi wa rasilimali za umma na uwajibikaji wa serikali, akisisitiza kuwa wananchi wanatarajia wawakilishi wao kulinda maslahi yao na kuhakikisha mahitaji yao yanazingatiwa katika maamuzi.
Rais Dk. Samia ametoa ujumbe huo kupitia picha mjongeo iliyooneshwa katika ufunguzi wa Mkutano wa 153 wa Umoja wa Mabunge Duniani (IPU), leo, Jumatatu, Oktoba 5, 2026, katika Kituo cha Mikutano cha Kimataifa Arusha (AICC). Waziri Mkuu, Dkt. Mwigulu Nchemba, amemwakilisha Rais Dkt. Samia katika ufunguzi rasmi wa mkutano huo unaofanyika Oktoba 5–9, 2026.
Amesema mamlaka ya mabunge yanatokana na wananchi, hivyo yana wajibu wa kutunga sheria kwa maslahi ya umma, kuchunguza mgawanyo na matumizi ya rasilimali na kuziwajibisha serikali. Ameeleza kuwa serikali yake inaheshimu jukumu la Bunge la kuisimamia na kuishauri, kwa kuwa linaimarisha utendaji na uwajibikaji kwa Watanzania.
Rais Dk. Samia amesema kaulimbiu ya mkutano kuhusu kuimarisha utawala bora na kuziwezesha jamii kupitia ushirikishwaji, kuaminiana na fursa kwa wote inaendana na changamoto za sasa duniani. Amehimiza mabunge kutathmini makubaliano yanayofikiwa na serikali na kuendeleza ushirikiano unaovuka tofauti za kisiasa na mipaka ya nchi.
Akizungumza katika ufunguzi huo, Waziri Mkuu amesema mabunge yana nafasi muhimu katika kuhakikisha taasisi za umma zinaitikia mahitaji ya wananchi kupitia utungaji wa sheria, uidhinishaji wa matumizi ya fedha na usimamizi wa shughuli za serikali. Ametaja kuimarishwa kwa Ofisi ya Mdhibiti na Mkaguzi Mkuu wa Hesabu za Serikali (CAG), iliyotengewa zaidi ya Sh. bilioni 132 katika mwaka wa fedha 2026/2027, kuwa sehemu ya juhudi za kuimarisha usimamizi wa rasilimali za umma.
Dk. Mwigulu amesema Rais Dkt. Samia anaamini katika utawala wa kikatiba na mgawanyo wa madaraka, akisisitiza kuwa taasisi imara na huru ni muhimu katika kujenga jamii zenye ustawi, utulivu na ushirikishwaji.
