Na ATHNATH MKIRAMWENI
RAIS Dk. Samia Suluhu Hassan, amewataka wenye dhamana ya kusimamia mtihani ya kidato cha nne kutekeleza majukumu yao kwa weledi, umakini, uadilifu na kuhakikisha mitihani inafanyika kwa haki, amani na usalama.
Kwa mujibu wa taarifa aliyoituma kupitia ukurasa wake wa instagram, aliwatakia kila la kheri wanafunzi wa kidato cha nne wanafanya mitihani ya kuhitimu elimu ya sekondari nchini.
Rais Samia, alisema ni imani yake kuwa, wanafunzi hao, wamejiandaa vyema kwa hatua hiyo muhimu katika safari yao ya kielimu.
“Ninamwomba Mwenyezi Mungu awajalie afya njema, utulivu na uwezo wa kufanya mitihani yenu kwa umakini na kujiamini.
“Aidha, ninatoa wito kwa wote wenye dhamana ya kusimamia mitihani hii kutekeleza majukumu yenu kwa weledi, umakini na uadilifu na kuhakikiasha mitihani inafanyika kwa haki, amani na usalama,” alisema Rais Samia.
Juzi, Katibu Mtendaji wa Baraza la Mitihani la Tanzania (NECTA), Profesa Said Mohamed alisema jumla ya watahiniwa 667,040 wamesajiliwa kufanya Mtihani wa Kidato cha Nne mwaka huu, wakiwemo watahiniwa wa shule 644,085 na watahiniwa wa kujitegemea 22,955.
Mtihani huo umeanza jana hadi Novemba 6, mwaka huu, katika shule za sekondari 6,265 na vituo vya watahiniwa wa kujitegemea 802.
Profesa Said Mohamed, alisema kati ya watahiniwa 644,085 wa shule, wavulana ni 297,309 sawa na asilimia 46.16, huku wasichana wakiwa 346,776 sawa na asilimia 53.84.
Alisema watahiniwa wa shule wenye mahitaji maalum ni 910, wakiwemo wenye uoni hafifu 455, wasioona 13, wenye uziwi 98, wenye ulemavu wa akili 21 na wenye ulemavu wa viungo 323, ambao wanapaswa kupata huduma zinazowawezesha kufanya mtihani kwa haki sawa na wengine.
Kwa upande wa watahiniwa wa kujitegemea, alisema kati ya 22,955 waliosajiliwa, wavulana ni 10,223 sawa na asilimia 44.53, huku wasichana wakiwa 12,732 sawa na asilimia 55.47.
Watahiniwa wa kujitegemea wenye mahitaji maalumu ni 73, wakiwemo wenye uoni hafifu 69 na wasioona wanne.
Profesa Mohamed, alisema idadi ya watahiniwa wa shule imeongezeka kutoka 569,883 mwaka 2025 hadi 644,085 mwaka 2026, ikiwa ni ongezeko la watahiniwa 74,202, sawa na asilimia13.02, ikilinganishwa na mwaka uliopita.
Katibu Mtendaji huyo, alisema mtihani ni muhimu kwa kuwa, unapima umahiri wa watahiniwa katika yale yote waliyojifunza kidato cha kwanza hadi cha nne.
Pia, alisema matokeo hutumika katika uchaguzi wa watahiniwa wanaojiunga na kidato cha tano pia fani mbalimbali za utaalamu wa kazi kama afya, kilimo, ufundi na nyinginezo.
