RIYADH, Saudi Arabia
STAA Cristiano Ronaldo, amethibitisha kwamba atastaafu kucheza soka baada ya kumalizika michuano ya Kombe la Dunia mwaka 2026.
Mkongwe huyo raia wa Ureno mwenye umri wa miaka 40, amesema anatarajia kustaafu soka baada ya mwaka mmoja au miwili ijayo.
Msimu ujao wa michuano ya Kombe la Dunia, unatarajiwa kufanyika katika nchi za Canada, Mexico na Marekani ambapo Ronaldo utakuwa msimu wake wa sita.
Amesisitiza michuano ya Kombe la Dunia msimu ujao ndiyo itakuwa mara yake ya mwisho kushiriki, hivyo atastaafu na kuwaachia vijana kuendelea pale atakapoishia.
“Baada ya kumalizika msimu ujao wa Kombe la Dunia nitakuwa nimeshafikisha miaka 41, hivyo nitalazimika kustaafu kucheza soka.
“Michuano ijayo ya Kombe la Dunia ninatarajia itakuwa na ushindani mkubwa, baada ya hapo nitastaafu kucheza soka na kuwaachia vijana waendelee pale nitakapoishia,” alisema.
Ronaldo anayeichezea Al-Nassr ya Ligi Kuu ya Saudi Arabia, ameshafunga mabao 143 katika timu yake ya taifa ya Ureno.
Mchezaji huyo wa zamani wa Manchester United, Real Madrid na Juventus alisisitiza baada ya kumalizika michuano ya Kombe la Dunia, atatundika daluga na kuendelea kufanya shughuli zingine nje ya soka.
“Acha niwe mkweli, baada ya mwaka mmoja au miwili ijayo nitalazimika kustaafu soka kwani umri wangu utakuwa umefikia hatua hiyo, lakini nitaendela kuwa karibu na mchezo huo kila muda nitakaotakiwa kutoa msaada,” alisema.
Ronaldo alishaisaidia Ureno kubeba Kombe la Euro 2016 na kutwaa mara tano tuzo ya Mwanasoka Bora wa Dunia, Ballon d’Or.
Tayari kikosi cha Kocha Roberto Martinez, kimeshafuzu kushiriki michuano ya Kombe la Dunia msimu ujao.
