Na AMINA KASHEBA
ILE siku ya Watanzania kuishuhudia timu ya taifa ‘Taifa Stars’ ikiandika historia mpya katika fainali za Kombe la Mataifa ya Afrika (AFCON) inaweza kuwa leo kikosi hicho hicho kitakapochuana na Tunisia katika mchezo wa mwisho wa kundi C.
Taifa Stars itachuana na Tunisia kesho saa 1:00 usiku katika Uwanja wa Prince Moulay Abdellah uliopo Rabat, Morocco.
Katika mtanange huo wa aina yake, Taifa Stars itaingia na mambo mawili makubwa, kwanza kuandika historia ya kupata ushindi wake wa kwanza katika AFCON na pili kutinga hatua ya mtoano kwa mara ya kwanza.
Katika kundi hilo, Taifa Stars ipo nafasi ya tatu ikiwa na pointi moja sawa na Uganda inayoburuta mkia, kinara Nigeria tayari imeshafuzu ikiwa na pointi sita wakati Tunisia ikifuatia kwa pointi tatu.
Ili kutinga hatua ya mtoano, Taifa Stars chini ya Kocha Miguel Gamondi, inapaswa kupata ushindi katika mtanange huo dhidi ya miamba hiyo kutoka Kaskazini mwa Afrika.
Akizungumzia mechi hiyo, Kocha Gamondi, alisema kikosi chake kipo tayari kuwania pointi tatu katika mtanange huo wa aina yake.
Gamondi alisema lengo la timu yake ni kuvuna pointi tatu na kuandika historia ya kutinga katika hatua ya 16 ya fainali hizo kubwa zaidi katika soka Afrika.
”Tupo tayari kupambana katika mechi yetu ya mwisho ya makundi dhidi ya Tunisia, tupo hapa kulipambania taifa la Tanzania na inawezekana kesho (leo) tukaandika historia ya kushinda na kufuzu raundi ya 16 bora.
“Kila mtu anaweza kuwa kocha baada ya mechi ila tuangalie uhalisia wa ubora wa viwango vyetu katika soka muda mwingine tunapaswa tu kuweka uhalisia, mimi naipenda kazi yangu na napambana kwa kadri ya uwezo wangu tuwe vizuri, ” alisema.
Kocha huyo aliongeza kuwa, wankwenda kucheza na Tunisia ambayo mechi yake ya mwisho ilifungwa hivyo utakuwa mchezo mgumu kutokana na kila moja kuhitaji ushindi.
Nyota wa Taifa Stars, Novatus Dismas, alisema wachezaji wamejipanga kuhakikisha wanapata mabao na kuyalinda mabao ambayo watayapata katika mchezo dhidi ya Tunisia.
“Kuruhusu bao ni sehemu ya nyakati za mchezo tu, mechi ya leo tumejipanga kuhakikisha tunafunga bao lakini tunalinda isiwe kama michezo miwili iliyopita tukafanya makosa ya kuruhusu mabao mepesi,” alisema Dismas.
Kocha wa Tunisia, Sami Trabelsi alisema mechi hiyo ni muhimu kwao kwani malengo yao ni kuhitaji kufika hatua nyingine katika mashindano hayo.
“Tunafahamu umuhimu wa mechi dhidi ya Tanzania hivyo tuna matumaini tutashinda mchezo huo kwa kucheza vizuri, kwetu ni muhimu ni kama fainai ya kufuzu kwenda hatua nyingine, kiakili tumejiandaa na tumetumia muda mwingi kujiandaa,” alisema.
Katika michuano hiyo ya nne kwa Tanzania kushiriki, miamba hiyo haijawahi kushinda hata mechi moja kati ya mechi 11 ilizocheza katika AFCON, ikitoka sare mara nne na kufungwa mara saba.
Katika michuano ya mwaka 1980 iliyofanyika Nigeria, Taifa Stars ilipangwa kundi A na timu za Nigeria, Misri na Ivory Coast.
Taifa Stars iliburuta mkia kwa pointi moja baada ya kutoka sare na Ivory Coast. Awali, ilifungwa mabao 3-1 dhidi ya Nigeria na mabao 2-1 ilipovaana na Misri.
Katika AFCON mwaka 2019 zilizofanyika nchini Misri, Tanzania ilipangwa kundi C na timu za Algeria, Senegal na Kenya.
Taifa Stars ilimaliza katika kundi hilo ikiwa nafasi ya nne baada ya kufungwa mechi zote tatu.
Kikosi hicho kilichokuwa kikinolewa na Amunike, kilianza kwa kichapo cha mabao 2-0 dhidi ya Senegal, kichapo cha mabao 3-2 kutoka kwa Kenya na kichapo cha mabao 3-0 dhidi ya Algeria.
Pia, Taifa Stars iliburuta mkia katika hatua ya makundi ya AFCON mwaka 2023 zilizofanyika nchini Ivory Coast.
Ikiwa imepangwa kundi F, Stars ilivuna pointi mbili (nyingi zaidi ya AFCON ilizoshiriki awali), ikianza kwa kichapo cha mabao 3-0 dhidi ya Morocco, sare ya bao 1-1 kutoka kwa Zambia na suluhu dhidi ya DRC.
Mwaka huu, Tanzania ilianza kwa kichapo cha mabao 2-1 dhidi ya Nigeria kabla ya kutoka sare ya bao 1-1 kutoka kwa Uganda katika kundi C.
YAAHIDIWA MAMILIONI
Naibu Waziri wa Habari, Utamaduni, Sanaa na Michezo, Paul Makonda, alisema timu hiyo itapewa sh. milioni 200 kwa kila bao itakalofunga katika mtanange wa leo.
“Goli moja mtakalofunga ni sh. milioni 200, Watanzania wameniambia tunanunua goli moja katika mechi na Tunisia sh. milioni 200, Watanzania wanataka ushindi,” alisema.
Makonda ameitaka timu hiyo kujitoa kwa dhati kuhakikisha inafunga mabao mengi na kupata ushindi katika mtanange huo ili kujizolea mamilioni ya fedha na kuwapa furaha Watanzania.
