Na NASRA KITANA
ZIKIBAKI siku nne kabla ya kuvaana, timu za Yanga na Simba leo zinashuka dimbani katika viwanja tofauti katika michezo ya Ligi Kuu Tanzania Bara.
Yanga inayonolewa na Kocha Pedro Goncalves itachuana na JKT Tanzania saa 10:00 jioni katika Uwanja wa KMC, Dar es Salaam wakati Simba ya Steven Barker ikicheza na Dodoma Jiji saa 1:15 usiku katika Uwanja wa Jamhuri jijini Dodoma.
Baada ya mechi hizo, miamba hiyo ya soka nchini Jumapili hii itavaana katika Uwanja wa New Amaan Complex, Zanzibar katika mchezo wa 11 wa Ligi Kuu Bara.
Wakizungumza kwa nyakati tofauti, Kocha Barker alisema anajua mchezo dhidi ya Dodoma Jiji utakuwa mgumu lakini amekiandaa vyema kikosi chake kuvuna pointi tatu.
Barker alisema licha ya mechi hiyo kuwa ngumu, lakini hana wasiwasi kwani ana imani kubwa wachezaji wake watafanya kila linalowezekana kuvuna pointi tatu katika mtanange huo.
“Ninafahamu tunakwenda kukutana na mchezo mgumu lakini tumejipanga kucheza katika mpango wetu ili kuwa bora zaidi ya mpinzani na kutimiza malengo yetu ya kupata ushindi katika mechi hii,” alisema Barker.
Kocha wa Yanga, Pedro Goncalves, alisema mechi dhidi ya JKT Tanzania itakuwa ngumu lakini ana imani kikosi chake kitavuna pointi tatu katika mtanange huo.
Alisema wanapaswa kuwa tayari katika kila mchezo na kuonyesha uwezo waliokuwa nao kupata ushindi na kujizolea pointi tatu muhimu.
“Ukweli ni kwamba tuna muda mchache sana kujiandaa na mchezo ujao, tunapaswa kujiandaa vyema kuhakikisha tunapata matokeo licha ya changamoto ya muda wa kujiandaa, lakini sisi ni timu kubwa tunapaswa kukabiliana na kila kikwazo hasa katika mchezo dhidi ya JKT Tanzania,” alisema.
Pedro alisema kuwa utakuwa mchezo mzuri na wamefanya maboresho machache katika maeneo yenye mapungufu kuhakikisha wanafanya vizuri.
Katika msimamo wa ligi, Yanga ipo nafasi ya pili ikiwa na pointi 25 huku Simba ikiwa nafasi ya nne kwa alama 22, kila moja ikishuka dimbani mara tisa.
