Na NASRA KITANA
WAKATI timu za Simba na Yanga zikitarajiwa kurejea kuwapa burudani mashabiki na wapenzi wa soka nchini katika mechi za Ligi Kuu Tanzania Bara, viongozi wa timu hiyo wametamba kuwa watajizolea pointi tatu muhimu.
Simba inatarajiwa kushuka dimbani kesho kupambana na timu ya JKT Tanzania katika mchezo utakaochezwa katika Uwanja wa Meja Jenerali Isamuyo, kuanzia saa 1:00 usiku.
Kwa upande wa Yanga, itashuka dimbani kupambana na KMC, siku ya Jumapili katika pambano litakalopigwa Uwanja wa KMC, kuaniza saa 10:00 jioni.
Wakizungumza kwa nyakati tofauti, Meneja wa Habari na Mawasiliano Simba, Ahmed Ally alitamba kuwa timu yao imejipanga vizuri kuelekea katika mchezo huo.
“Tunaifahamu vizuri timu ya JKT Tanzania, wana kikosi bora na chenye ushindani mkubwa, lakini hatutakubali kupoteza mchezo huo,”alisema meneja huyo.
Ahmed alisema kuwa hawatakubali kuona wanadondosha pointi yeyote katika mechi zao za mzunguko wa kwanza kwani lengo kubwa ni kutimiza malengo waliojiwekea.
“Tunaingia katika mchezo mgumu na wenye changamoto kubwa, kwani JKT Tanzania inawachezaji wengi wenye ubora hivyo watahakikisha wanapambana kuweza kupata ushindi na kujizolea pointi tatu muhimu,” alisema Ahmed.
Ahmed aliwaomba mashabiki na wapenzi wa soka nchini kufika kwa wingi uwanjani ili kuwapa hamasa wachezaji wao washinde pambano hilo.
Naye Ofisa Habari wa Yanga Ally Kamwe alitamba kuwa wanaenda katika mchezo wao dhidi ya KMC kwa tahadhari kubwa ili kupata ushindi.
Alisema kwa sasa kila timu imejipanga kuhakikisha inashinda mechi zake za ndani na nje ili kupata pointi tatu muhimu.
“Kila mchezo kwetu ni fainali, tumejipanga vizuri kushinda kwani malengo yetu ni kupata ushindi,” alisema.
Kamwe alifafanua kwamba mashabiki na wapenzi wa soka nchini wanatakiwa kufika uwanjani kwa wingi uwanjani ili kushuhudia soka ya kiwango cha juu kutoka kwa wachezaji wa Yanga.
Mechi zingine ni Pamba Jiji dhidi ya Singid Black Stars utakaochezwa Novemba 8, mwaka huu katika Uwanja wa CCM Kirumba jijini Mwanza.
Namungo itacheza Novemba 9, mwaka huu na timu ya Azam FC,pambano litakalopigwa Uwanja wa Majaliwa mkoani Lindi.
